Librazhd/ Vrisnin kafshë të egra në park, policia po ndjek dy gjuetarë. Bllokohet mjeti fuoristradë

Policia e Elbasanit është duke kërkuar disa gjuetarë të paligjshëm në parkun Kombëtare të Shebenik Jabllanicës. Burime nga drejtoria e policisë së qarkut bënë me dije se në zbatim të planit të masave për parandalimin, evidentimin dhe  goditjen e rasteve të gjuetisë së paligjshme dhe në zbatim të ligjit “Për shpalljen e moratoriumit të gjuetisë në Republikën e Shqipërisë", është duke monitoruar rreptësisht pyjet, veçanërisht zonat e mbrojtura.

 Në këtë kuadër sot policia ka marrë informacion në “Parkun Kombëtar” në fshatin Dragostunjë, dy shtetas kryenin gjueti të paligjshme. Menjëherë në vendngjarje shkuan shërbimet e policisë në bashkëpunim me inspektorët e drejtorisë së  zonave të mbrojtura.  

Personat sapo kanë parë policinë, kanë braktisur mjetin dhe janë larguar. Policia ka bërë bllokimin e mjetit  dhe ka identifikuar drejtuesin e saj dhe shtetasin tjetër te cilët  do të ndëshkohen me masë administrative. Infoelbasani.al