35-vjeçarja nga Librazhdi gjendet pas 15 vitesh, “trondit” me deklaratën

Një vajzë nga Librazhdi ka rezultuar “e zhdukur” prej 15 vitesh. Ajo është gjendur ditën e hënë nga policia e Tiranës. Nga ana tjetër, familjarët e saj në Librazhd prej 15 vitesh nuk e kishin tërhequr denoncimin në polici duke mbajtur shpresat gjallë se do vinte një ditë e bukur, që do ja rikthente vajzën. Por, edhe pse vajza u gjet për ta nuk ka qenë një ditë komplet e bukur.

Esma T., aktualisht 38 vjeçe, është shoqëruar në Komisariatin nr.3 për të dhënë shpjegime se ku ka qenë gjatë gjithë këtyre viteve dhe përse nuk ka kontaktuar me familjarët. Ata ende nuk e kishin tërhequr denoncimin që kishin bërë më 4 mars të vitit 2002 në Komisariatin e Librazhdit, ku kishin kërkuar ndihmë për gjetjen e vajzës. E duket se kur kishin humbur të gjitha shpresat për gjetjen e saj, një telefonatë e mbërritur në numrin e babait të saj nga një oficer policie ka sjellë sa gëzim, aq edhe hidhërim për familje. Kjo, për shkak se Esma nuk ka pranuar të kthehet në shtëpi. Ajo ka pranuar që të flasë me të atin, pasi i është kërkuar nga oficeri i policisë, si një procedurë për dorëzimin e saj te familjarët, por ka refuzuar që të kthehet në Librazhd.   

Gjatë deklarimeve të saj, vajza, që kur u deklarua e humbur ishte vetëm 23 vjeç, është shprehur se ishte larguar me dëshirën e vet. Ajo ka thënë se nuk është larguar në asnjë moment nga Shqipëria dhe pjesën më të madhe të kohës e ka kaluar në Tiranë, ku ka ndërtuar jetën e saj. Largimin nga shtëpia ajo e ka arsyetuar me faktin se atje nuk i ofrohej asgjë, as nga familja as nga shoqërie dhe se gjatë gjithë kohës atje ka qenë e mbyllur, pa arritur të shohë asgjë se çfarë ndodhte jashtë shtëpisë së saj. Aktualisht, ajo ka thënë se preferon të kthehet më në shtëpinë e prindërve të saj, pasi ka ndërtuar jetën në kryeqytet. 

Burime nga Policia thanë se ka qenë një sinjalizim i disa të njohurve të familjes së 38- vjeçares, të cilët ishin në dijeni se ajo ishte denoncuar e humbur dhe e kishin parë në disa zona të ndryshme të Tiranës. Pavarësisht ndryshimit fizik të saj, ata kishin dyshime se bëhej fjalë për të njëjtën vajzë dhe i kanë kërkuar policisë që ta shoqëronte për verifikim, pasi për familjen ajo ishte e “zhdukur” prej 15 vitesh.